လေညှင်း

မင်းမူတဲ့စိတ်
စေစားရာအရပ်က
ဖုန်ထူထူကန္တာရထဲ
အပြုံးချင်းဖလှယ်ရင်း
နင်နဲ့ငါအတူသွားတော့....
အို!
တနေ့ထက်တနေ့
ပိုပိုပူလာ
တေးသွားတွေတစ်ပုဒ်ပြီးတစ်ပုဒ်
ပြိုင်တူရွတ်ဆိုကြ
နေပြင်းပြင်းထဲ
လေညှင်းလေးတစ်ချက်ဝှေ့တော့....
နင်နဲ့ငါပြိုင်တူပြုံးမိကြတယ်
ဟိုး အတိတ်က အကြွေး.....

သစ်ရွက်ခြောက်လား

တစ်ချိန်တစ်ခါ

စိမ်းလန်းခဲ့ဖူးတဲ့ နေ့ရက်တွေရဲ့နောက်ကွယ်က

ဆူးငြှောင့်ခလုတ်များစွာ

ခရာဆူးခြုံတွေထဲက ကန္တာရ အရွက်စိမ်းလေးတစ်ရွက်

ခပ်ပြင်းပြင်းလေကြမ်းတစ်ကြိမ်ရဲ့နောက်

အားမတန်လို့ လိုက်ခဲ့ရတဲ့အဖြစ်လည်း

မကြုံစေချင်ဘူး.....


တစ်ခါတစ်ရံ

ညှိုးနွမ်းခဲ့ဖူးတဲ့ စိတ်ကော်ဇောရဲ့တောက်ပမှုဟာ

ဟန်ဆောင်မာယာများစွာနောက်

သံသယတချို့ထဲက အတ္တစိမ်းစိမ်းလေးအဖြစ်

အာဃာတနွံမှာ နှစ်မြှုပ်လိုက်တဲ့အချိန်

အပြုံးပျောက်လို့ အမုန်းတောက်ရတဲ့အဖြစ်လည်း

မကြုံစေချင်ဘူး....


တစ်ခဏများစွာမှာ

ဥပေက္ခာမျက်လုံးများနဲ့

အဆာမပြေ နှလုံးသားအာဟာရကို

ဆန္ဒများက ဖြည့်ဆည်း

ဝေဝါးသွားတဲ့ဆင်ခြင်တုံအောက်က

သစ်ရွက်ခြောက်တစ်ရွက်အဖြစ်

မြေပေါ်ကြွေမှာလား

လေပေါ် ဝဲရင်း ကြေမွသွားမှာလား?


ကဲ....အသင် 

အသင့်ရဲ့ဆန္ဒအတိုင်းပေါ့

ကိုယ်စောင့်ကြည့်နေမယ်...

တောင်ကြီး နဲ့ မော်လမြိုင်အမှတ်တရ

လူတိုင်းမှာ မိမိရဲ့အောက်မေ့တသ သတိရစရာနေရာလေးတွေ နယ်မြေလေးတွေ ရှိကြမှာပါ။ ကျွန်မအတွက်လည်း တောင်ကြီးမြို့နဲ့ မော်လမြိုင်မြို့ဟာ အမှတ်တရ သတိရစရာနေရာတွေပါ။



အခုတော့ ကျွန်မ ၁၉၈၈ ကနေ ၂၀၀၄ အထိ နေထိုင်ခဲ့ရာ မော်ရွှေမြိုင်မြို့အမှတ်တရအဖြစ် ဒီသီချင်းလေးကို မျှဝေလိုက်တာပါ။ မော်လမြိုင်မြို့ရဲ့ အထင်ကရ အမှတ်ရစရာနေရာလေးတွေအားလုံးနီးပါး ဒီသီချင်း MTV လေးကိုကြည့်ရင်း စိတ်ကူးနဲ့ လည်ကြည့်ကြရအောင်လားရှင်။

တောင်ကြီးမြို့ အမှတ်တရ






ဒါကတော့ တောင်ကြီးမြို့ရဲ့ အထင်ကရ မီးပုံပျံပွဲတော်အကြောင်း သီဖွဲ့ဆိုထားတာပါ။ တောင်ကြီးမြို့ရဲ့ တန်ဆောင်တိုင်မီးပုံးပျံပွဲတော်အလှကို မြင်တွေခံစားကြရမှာပါ။ ကျွန်မရဲ့ ဇာတိမြေဖြစ်တဲ့ တောင်ကြီးမြို့အမှတ်တရအဖြစ်ပါ။ ဒီမီးပုံးပျံပွဲတော်ကျင်းပတဲ့ ကွင်းကြီးနဲ့ မလှမ်းကမ်းက ဗိုလ်ချုပ်ကြေးရုပ်ကြီးကို ကျွန်မငယ်ငယ်တုန်းက မိဘများနဲ့အတူ ရုံးပိတ်ရက်တွေမှာ အမြဲအလည်ရောက်ဖြစ်ခဲ့တယ်။ ဗိုလ်ချုပ်ရဲ့အကြောင်းကိုလည်း ဖေဖေနဲ့မေမေက အမြဲပြောပြခဲ့တာလေ။ ဒီကြေးရုပ်ပန်းခြံနဲ့ မနီးမဝေးက မိခင်နဲ့ကလေး ဆေးရုံကြီးမှာ ကျွန်မကို မေမေက ၁၉၈၁ ခုနှစ် အောက်တိုဘာလ တောင်ကြီးမြို့ရဲ့ သီတင်းကျွတ် ကထိန်ခင်းပွဲတော်မတိုင်မီလေးမှာ မွေးဖွားခဲ့တာပါ။ မီးပုံပျံပွဲဟာ တောင်ကြီးမှာနေခဲ့စဉ် ၁၉၈၂ ကနေ ၁၉၈၈ အထိ ကျွန်မထိတွေ့ခံစားခဲ့ရပါတယ်။ မီးပုံးပျံတွေလွှတ်တဲ့ညပိုင်းတစ်ခင်းလုံး ပွဲခင်းထဲမှာ ကျွန်မဖေဖေနဲ့အတူ ရှူးဒိုင်းလွှတ်ရင်း စောင်ကြည့်ခဲ့ရတာများပါတယ်။ ကျွန်မသိပ်ပျော်ရွှင်ခဲ့ရတဲ့ တောင်ကြီးမြို့မှာခြေချခွင့်ရခဲ့တဲ့ ကာလလေးတွေကို ပြန်မြင်ယောင်ခံစားရင်း ဒီသီချင်းလေးကို မျှဝေဖြစ်တာပါ။ မီးပုံးပျံပွဲခင်းထဲ ဒီသီချင်း MTV လေးကြည့်ရင်း စိတ်ကူးနဲ့အလည်တစ်ခေါက် သွားကြရအောင်လားရှင်။